NLI ar Flickr Commons
Ó 2010 i leith, tá Leabharlann Náisiúnta na hÉireann ag roinnt íomhánna óna bailiúchán 5.2 milliún grianghraf trí Flickr, láithreán óstála grianghraf.
In 2011, chuaigh NLI isteach i rannóg ar leith de Flickr, The Flickr Commons, agus thosaíomar ag roinnt íomhánna ónár mbailiúcháin nach raibh aon srianta cóipchirt i gceist leo leis an bpobal i gcoitinne. Mar aon le níos mó ná céad leabharlann, cartlann agus músaem náisiúnta eile, leanfaimid ag roinnt ár mbailiúchán grianghrafadóireachta le lucht féachana ollmhór ar líne trí Flickr Commons. Tugann úsáideoirí Flickr a gcuid ama go saor go fial chun cabhrú linn faisnéis thábhachtach fúthu a aithint.
De ghnáth roinntear grianghraf amháin gach lá den tseachtain, agus anois tá níos mó ná 3,500 grianghraf (ag fás i gcónaí) ar shruth grianghraf NLI Flickr Commons don phobal chun imscrúdú a dhéanamh orthu, comhthéacs a chur leo nó taitneamh a bhaint astu. Ó 2011 i leith, measaimid go bhfuil níos mó ná 111 milliún amharc ar na grianghraif. Ó gach cearn d'Éirinn agus níos faide i gcéin, tá réimse taighdeoirí deonacha tar éis 70,000 trácht a chur ar fáil a chabhraíonn leis an tuiscint ar na híomhánna a shaibhriú. Téann an t-aiseolas sin isteach i gcatalóg Leabharlann Náisiúnta na hÉireann, ag breisiú a bhfuil ar eolas cheana faoin mbailiúchán grianghraf faoinár gcúram.
Shainaithin ár dtaighdeoirí daoine agus áiteanna, chúngaigh siad raonta dátaí, agus nochtaigh siad scéalta pearsanta ó na radhairc choitianta agus eisceachtúla a fheictear sna grianghraif sin. Ba é an rannpháirtíocht a d'eascair as na poist seo an chuid is luachmhaire den tionscadal ar fad agus chabhraigh sé linn croí-mhisean NLI a chomhlíonadh, i.e. 'cuimhne thaifeadta na hÉireann a bhailiú, a chosaint agus a chur ar fáil'.
An Próiseas
Grúpa beag tiomanta oibrithe deonacha, le tacaíocht ó fhoireann NLI, a roghnaíonn na grianghraif, a chuireann i gcomhthéacs iad agus uaslódálann chuig cuntas NLI Flickr Commons iad. Coinníonn siad súil freisin ar na tráchtanna agus ceisteanna ó úsáideoirí a idirghníomhaíonn leis na grianghraif. Rannchuidíonn pobal Flickr, dá réir sin, faisnéis bunaithe ar a gcuid eolais, saineolais nó taighde féin. Is minic a théitear i gcomhairle le réimse leathan foinsí creidiúnacha chun ardchaighdeáin chruinnis a chinntiú, lena n-áirítear foinsí ar líne amhail taifid daonáirimh, bunachair sonraí stairiúla, leabhair, nuachtáin nó foinsí béil ó theaghlaigh nó ó phobail. Ó am go chéile, streachail úsáideoirí trí pháirceanna mar iarracht chun láthair bheacht ghrianghraif a chinneadh.
Bí páirteach
Ba mhór againn tusa a bheith páirteach sa tionscadal chun é a choinneáil ag gabháil. Tugaimid cuireadh d’úsáideoirí sruth grianghraf Flickr NLI a fhiosrú chun braistint a fháil ar an gcaoi a ndéanaimid taighde ar gach grianghraf. Murar mian leat aon bharúil a thabhairt, bain taitneamh as na híomhánna agus lean na scéalta de réir mar a tharlaíonn siad. Más mian leat a bheith níos rannpháirtí, nó más mian leat eolas a chur ar fáil, ceist a chur nó nóta tráchta a chur leis, níl le déanamh ach cuntas Flickr saor in aisce a chruthú le bheith páirteach sa chomhrá…
Tabhair cuairt ar leathanach Flickr Commons Leabharlann Náisiúnta na hÉireann anseo.
Cuirfidh clárú le haghaidh cuntas Flickr saor in aisce ar do chumas tuairimí a phostáil.
Tuilleadh
