Ráiteas maidir le Príobháideachas Sonraí

Is “rialaitheoirí sonraí” iad na daoine nó na heagraíochtaí a chinneann na críocha a ndéantar Sonraí Pearsanta a phróiseáil ina leith agus an bealach a ndéantar an phróiseáil sin, agus a dhéanann cinntí neamhspleácha i ndáil leis na Sonraí Pearsanta agus/nó a rialaíonn na Sonraí Pearsanta sin ar bhealach ar bith eile.

Chun críocha an Rialacháin Ghinearálta maidir le Cosaint Sonraí (RGCS), is í Leabharlann Náisiúnta na hÉireann (an Leabharlann) an rialaitheoir sonraí maidir leis na Sonraí Pearsanta a bhfuil tuairisc orthu sa Ráiteas Príobháideachais seo. Is é misean na Leabharlainne Náisiúnta cuimhne thaifeadta na hÉireann a bhailiú, a chosaint agus a chur ar fáil, aire a thabhairt do bhreis agus dhá mhilliún déag mír atá faoinár gcúram, lena n‑áirítear leabhair, lámhscríbhinní, nuachtáin, grianghraif, priontaí, léarscáileanna, léaráidí, earraí inbhailithe, ceol agus meáin dhigiteacha.

Tá feidhm an Oifigigh Cosanta Sonraí curtha amach ar conradh ag an Leabharlann Náisiúnta do XpertDPO Ltd.

Is féidir teagmháil a dhéanamh lenár nOifigeach Cosanta Sonraí mar seo a leanas:
Ríomhphost: dataprotection@nli.ie
Seoladh poist: 4 Sráid Chill Dara, Baile Átha Cliath 2, D02 A322

Is é cuspóir an Ráitis Príobháideachais seo ráiteas a sholáthar duit, mar an duine is ábhar do na sonraí, maidir le cleachtais agus ceanglais na Leabharlainne i ndáil le Cosaint Sonraí agus le Príobháideachas mar aon le míniú ar na cearta atá agat mar an duine is ábhar do na sonraí. 

Tá feidhm ag an Ráiteas Príobháideachais seo maidir lenár gcleachtais eagraíochtúla agus lenár suíomh gréasáin atá ar fáil ar www.nli.ie. 

Ó tharla go bhfuil an Eagraíocht bunaithe i bPoblacht na hÉireann, tá an doiciméad seo bunaithe ar Dhlí na hÉireann maidir le Cosaint Sonraí, agus tá an Leabharlann Náisiúnta faoi dhlínse Choimisiún na hÉireann um Chosaint Sonraí. Leagtar amach sa Ráiteas Príobháideachais seo na Sonraí Pearsanta maidir leat a bhailímid agus phróiseálaimid i ndáil le seirbhísí agus le feidhmeanna na hEagraíochta. Nílimid freagrach as an ábhar ná as na fógraí príobháideachais ar shuíomhanna gréasáin a bhféadfaimis naisc sheachtracha a chur ar fáil chucu.

• An Rialachán Ginearálta maidir le Cosaint Sonraí (Rialachán AE 679/2016)
• Achtanna na hÉireann um Chosaint Sonraí, 1988 go 2018
• Rialacháin a eascraíonn as an Acht um Chosaint Sonraí, 2018
• Na Rialacháin maidir le r-phríobháideachas, 2011, lena gcuirtear chun feidhme Threoir AE 2002/58/CE maidir le Príobháideachas agus Cumarsáid Leictreonach, ar a dtugtar an Treoir maidir le r-phríobháideachas freisin
• An tAcht um Chartlann Náisiúnta, 1986, Rialacháin 1988

Faoi dhlíthe maidir le cosaint sonraí agus príobháideachas sonraí, tá cearta ag daoine aonair maidir le húsáid a Sonraí Pearsanta ag eagraíochtaí, lena n‑áirítear ár n‑eagraíocht féin. Le dlíthe na hÉireann agus an Aontais Eorpaigh maidir le cosaint sonraí, rialaítear na gníomhaíochtaí ar fad a bhíonn ar siúl againn i ndáil le bailiú, stóráil, láimhseáil, nochtadh agus úsáidí eile Sonraí Pearsanta.

Ní mór dúinn na dlíthe maidir le cosaint sonraí agus príobháideachas sonraí a chomhlíonadh mar tá ceangal dlí orainn é sin a dhéanamh, ach ba mhaith linn freisin go mbeadh muinín agat ionainn. Má chloímid leis an dlí maidir le cosaint sonraí, cabhraíonn sé linn dea-cháil a choinneáil maidir leis an gcaoi a mbíonn Sonraí Pearsanta á láimhseáil againn.

Ceanglaítear orainn freagracht a léiriú as na ceanglais atá orainn ó thaobh cosaint sonraí de. Ciallaíonn sé sin nach mór dúinn a bheith in ann léiriú a thabhairt ar an gcaoi a mbíonn na dlíthe is infheidhme maidir le cosaint sonraí agus príobháideachas sonraí a gcomhlíonadh againn, agus gur chomhlíonamar na dlíthe iarbhír. 

Déanaimid é sin, i measc nithe eile, lenár mbeartais agus ár nósanna imeachta i scríbhinn, trí chomhlíonadh cosanta sonraí agus príobháideachais sonraí a leabú inár gcórais agus inar rialacha gnó, trí mhonatóireacht inmheánach a dhéanamh ar ár gcomhlíonadh ó thaobh cosaint sonraí agus príobháideachas sonraí de agus athbhreithniú leanúnach a dhéanamh orthu, agus trí bhearta a ghlacadh más rud é nach mbíonn na rialacha a gcomhlíonadh ag ionadaithe dár gcuid, fostaithe nó conraitheoirí ina measc. 

Tá dualgais áirithe orainn freisin i ndáil le taifid a choinneáil faoinár bpróiseáil sonraí.

Ní mór dár n‑ionadaithe go léir, fostaithe agus conraitheoirí ina measc, ár mBeartais agus ár Nósanna Imeachta maidir le Cosaint Sonraí, ar a bhfuil an Ráiteas Príobháideachais seo bunaithe, a chomhlíonadh agus Sonraí Pearsanta á bpróiseáil acu ar ár son.

Tá sé d’aidhm againn cloí leis na prionsabail seo a leanas atá le fáil sna dlíthe maidir le Cosaint Sonraí:

• Dlíthiúlacht, cothroime agus trédhearcacht – ní mór sonraí pearsanta a phróiseáil ar bhealach atá dleathach, cothrom agus trédhearcach.
• Teorannú de réir cuspóra – ní mór sonraí pearsanta a bhailiú chun críoch sonraithe, sainráite agus dlisteanach agus ní dhéanfar próiseáil bhreise orthu ar shlí atá ar neamhréir leis na críocha sin.
• Íoslaghdú sonraí – beidh Sonraí Pearsanta leormhaith, ábhartha agus teoranta don mhéid is gá maidir leis na críocha dá ndéantar iad a phróiseáil.
• Beachtas – Ní mór do shonraí pearsanta a bheith beacht agus, nuair is gá, cothrom le dáta. Ba cheart Sonraí Pearsanta míchruinne a cheartú nó a scriosadh.
• Coinneáil – Ba cheart sonraí pearsanta a choinneáil i bhformáid inaitheanta, agus níor cheart iad a choinneáil ar feadh tréimhse is faide ná mar is gá.
• Sláine agus rúndacht – Ba cheart sonraí pearsanta a choinneáil ar bhealach slán.
• Cuntasacht – Ní mór dúinn cloí leis na sé phrionsabal ghinearálta thuas faoi RGCS agus, anuas air sin, ní mór dúinn a bheith in ann a léiriú freisin go mbímid ag cloí leo trí chinntí a chlárú agus taifid a choinneáil orthu.

Sonraí Pearsanta

Faisnéis phearsanta ar bith a thugann tú go deonach don Leabharlann trí fhoirmeacha gréasáin, mar shampla Foirm Réamhchláraithe Léitheora, nó ríomhphost a úsáid, déileálfar leis an bhfaisnéis sin ar na caighdeáin slándála agus rúndachta is déine, agus ar aon dul leis na hAchtanna um Chosaint Sonraí, 1988 go 2018, agus le RGCS.

Na cineálacha sonraí a bhailímid

Sonraí de chatagóir speisialta

Is féidir linn sonraí íogaire – nó ‘Sonraí de chatagóir speisialta’ – maidir leat a bhailiú chun cabhrú leat agus chun ár seirbhís(í) a sholáthar. 

• Sonraí a bhaineann le cúrsaí sláinte (mar shampla, má tá riachtanais inrochtaineachta ar leith ag cuairteoir).

• Sonraí pearsanta lena léirítear creideamh reiligiúnach nó fealsúnachta (mar shampla, riachtanais chothaithe ag campaí samhraidh).
• Sonraí pearsanta lena léirítear bunús ciníoch nó eitneach (mar shampla, do náisiúntacht tríd an aitheantas a thugtar).
• Sonraí a bhaineann le saol gnéis nó claonadh gnéis duine nádúrtha (mar shampla inscne tríd an aitheantas a thugtar, mar shampla pas, teastas breithe agus iarratais maidir le stair an teaghlaigh / araltas á ndéanamh).

Sonraí leanaí

Is féidir linn sonraí leanaí a bhailiú chun cabhrú leat agus chun ár seirbhís(í) a sholáthar do leanaí. Déantar é sin le toiliú an tuismitheora nó an chaomhnóra i gcás ina bhfuil an leanbh faoi bhun 16 bliana d’aois.

• Céadainm agus sloinne leanaí ag freastal ar imeachtaí na Leabharlainne (mar shampla campaí samhraidh)
• Grianghraif nó íomhánna ó fhíseán (i gcás ina bhfaightear iad sin le toiliú ó thuismitheoir, mar shampla ag taispeántais, cainteanna)

Sonraí maidir le cionta coiriúla

Ní bhailíonn an Leabharlann aon fhaisnéis ar chiontuithe ná ar chionta coiriúla.

Teilifís Ciorcaid Iata (TCI)

Tá Teilifís Ciorcaid Iata (TCI) in úsáid ag an Leabharlann inár bhfoirgnimh agus timpeall orthu. Úsáidimid TCI chun sábháilteacht agus slándáil shuíomhanna na Leabharlainne a áirithiú agus chun cabhrú le coireacht nó gníomhaíochtaí neamhdhleathacha a chosc agus a bhrath. Tá fógraí maidir le próiseáil chóir ar taispeáint againn, mar aon le Beartas TCI is féidir a léamh anseo. 

Foirm Réamhchláraithe Léitheora

Ní mór duit an Fhoirm Réamhchláraithe Léitheora ar líne a chomhlánú chun iarratas a dhéanamh ar thicéad léitheora. An fhaisnéis a chuireann tú ar fáil, úsáidtear í chun taifead ríomhaireachta a chruthú i d’ainm féin a stóráiltear i mbunachar sonraí. Is féidir linn d’iarratas ar thicéad léitheora a phróiseáil go hiomlán leis an bhfaisnéis a chuireann tú ar fáil nuair atá tú ag clárú agus cabhraíonn sí linn tú a chur i dtreo na seirbhíse nó na mbailiúchán cuí. Ní úsáidfear faisnéis bhreise a sholáthraíonn tú fút féin ach ar mhaithe le seirbhísí amach anseo a fhorbairt agus – má chuireann tú in iúl go bhfuil a leithéid uait – chun gníomhaíochtaí agus imeachtaí na Leabharlainne a chur in iúl duit.

Is é cuimhne thaifeadta na hÉireann a bhailiú, a chosaint agus a chur ar fáil an misean atá ag an Leabharlann Náisiúnta. Tá an Leabharlann faoi réir na reachtaíochta maidir le cartlannú agus bailiú taifead.

Mar chomhlacht atá luaite sa sceideal leis an Acht um Chartlann Náisiúnta, 1986, tá an Leabharlann Náisiúnta faoi réir an Achta um Chartlann Náisiúnta, 1986, agus Rialacháin 1988. Tá an tAcht agus na Rialacháin infheidhme maidir le bainistíocht chartlainne taifead, lena n‑áirítear diúscairt agus coinneáil taifead. Tá dualgas ar an Leabharlann cloí leis an Acht um Chartlann Náisiúnta agus a áirithiú go gcoinnítear taifid agus sonraí i gcomhréir leis an Acht.

Feidhmíonn an tAcht laistigh de chreat dlíthiúil maidir le bainistíocht taifead. D’fhéadfaí a chuimsiú faoin gcreat sin freisin reachtanna a bhaineann le réimsí amhail cosaint sonraí, saoráil faisnéise, agus reachtaíocht a bhaineann le réimsí sonracha oibre amhail an oidhreacht chultúrtha, an chosaint shóisialta agus bailiú cánach, i measc réimsí eile.

Níl aon reachtaíocht níos tábhachtaí ná an tAcht um Chartlann Náisiúnta, 1986, maidir le bainistíocht taifead poiblí, lena n‑áirítear taifid a scriosadh, a choinneáil nó a choimeád siar. Sula bhféadfaí taifid a scriosadh, a choinneáil nó a choimeád siar, ní mór cloí leis na forálacha a leagtar amach san Acht um Chartlann Náisiúnta, 1986, agus i Rialacháin 1988.

Is é Airteagal 6(1)(e) an bunús dlí faoina gcoinníonn an Leabharlann sonraí inár gcartlanna – is gá an phróiseáil a dhéanamh chun cúram a chur i gcrích a dhéantar ar mhaithe le leas an phobail. 

Coinníonn an Leabharlann sonraí chun críoch cartlannaithe (Airteagal 89(3) de RGCS agus Alt 42 den Acht um Chosaint Sonraí, 2018). I gcás ina ndéantar sonraí pearsanta a bhailiú (a phróiseáil) chun críoch cartlannaithe ar mhaithe le leas an phobail, is ann do mhaoluithe sonracha ar na cearta mar a leagtar amach in Airteagail 15, 16, 18 agus 21 de RGCS.

Tá an Leabharlann faoi réir an Achta um Fhorais Chultúir Náisiúnta, 1997, freisin (I.R. 11/97). Sonraítear in Alt 12(1) den Acht gurb iad príomhfheidhmeanna Bhord na Leabharlainne an t‑ábhar leabharlainne i mbailiúchán na Leabharlainne Náisiúnta a chaomhnú, a athchóiriú, a chothabháil agus a mhéadú ar mhaithe leis an bpobal agus taifead ar ábhar leabharlainne maidir le hÉirinn (lena n‑áirítear ábhar a bhaineann leis an nGaeilge) a bhunú agus a chothabháil.

Féadfaidh an Leabharlann sonraí a stóráil ar feadh tréimhsí is faide i gcás ina ndéanfar próiseáil ar na sonraí pearsanta chun críoch cartlannaithe amháin ar mhaithe le leas an phobail, chun críoch eolaíoch nó stairiúil nó chun críoch staitistiúil, faoi réir cur chun feidhme beart iomchuí teicniúil agus eagraíochtúil chun cearta agus saoirsí an duine is ábhar do na sonraí a chosaint.

I gcás nach bhfuil sonraí faoi réir an Achta um Chartlann Náisiúnta agus na Rialachán, ní choinneoidh an Leabharlann sonraí ach ar feadh na tréimhse is gá chun na gcríoch dár bhailíomar iad a chomhlíonadh, lena n‑áirítear chun aon cheanglas dlíthiúil, cuntasachta nó tuairiscithe a chomhlíonadh.

Chun an tréimhse choinneála iomchuí a chinneadh le haghaidh sonraí pearsanta, cuirimid san áireamh méid, nádúr agus íogaireacht na sonraí pearsanta, an riosca féideartha díobhála a d’eascródh as úsáid neamhúdaraithe nó nochtadh do shonraí pearsanta, na cuspóirí dá bpróiseálaimid do shonraí pearsanta agus cé acu an féidir nó nach féidir linn na cuspóirí sin a chomhlíonadh ar bhealach eile, agus na ceanglais dhlíthiúla is infheidhme.

Ceanglaímid ar gach tríú páirtí aird a léiriú ar shlándáil do shonraí pearsanta agus caitheamh leis na sonraí de réir an dlí. Ní cheadaímid dár soláthraithe seirbhíse tríú páirtí do shonraí pearsanta chun a gcríoch féin agus ní cheadaímid dóibh do shonraí pearsanta a phróiseáil ach chun críoch sonraithe amháin agus i gcomhréir lenár dtreoracha.

Nuair a thoilíonn tú do shonraí pearsanta a thabhairt dúinn, iarrfaimid ort freisin toiliú le comhroinnt do shonraí pearsanta leis na tríú páirtithe atá leagtha amach thíos. Tá conarthaí i bhfeidhm ag an Leabharlann agus déanaimid dícheall cuí maidir lenár soláthraithe agus tríú páirtithe ábhartha.

• Comhlachtaí seirbhíse poiblí eile amhail an Oifig Náisiúnta um Sheirbhísí Comhroinnte, an Chartlann Náisiúnta agus comhlachtaí eile
• Soláthraithe seirbhíse a ghníomhaíonn mar phróiseálaithe bunaithe in Éirinn agus san Eoraip a sholáthraíonn seirbhísí forbartha, TF, agus riaracháin córais agus taistil.
• Soláthraithe teicniúla arb eintitis eile iad a idirghníomhaíonn linn i dtaca leis na seirbhísí a bhíonn á soláthar againn.
• Sainchomhairleoirí gairmiúla a ghníomhaíonn mar phróiseálaithe, rialaitheoirí nó comhrialaitheoirí lena n‑áirítear dlíodóirí, baincéirí, iniúchóirí agus árachóirí bunaithe in Éirinn a sholáthraíonn seirbhísí comhairleachta, baincéireachta, dlíthiúla, árachais agus cuntasaíochta.
• Rialtóirí agus údaráis eile mar phróiseálaithe, rialaitheoirí nó comhrialaitheoirí bunaithe in Éirinn a cheanglaíonn tuairisciú a dhéanamh ar ghníomhaíochtaí próiseála in imthosca áirithe.

Tá cuid dár dtríú páirtithe seachtracha bunaithe lasmuigh den Limistéar Eorpach Eacnamaíoch (LEE), mar sin aistreofar sonraí lasmuigh de LEE mar chuid den phróiseáil a dhéanann siad ar do shonraí pearsanta.  

Nuair a aistrímid do shonraí lasmuigh de LEE, áirithímid go dtugtar an leibhéal céanna cosanta dóibh ach a áirithiú go gcuirtear chun feidhme aon cheann amháin ar a laghad de na cosaintí seo a leanas:

• Féadfaimid do shonraí pearsanta a aistriú chuig tíortha a measann an Coimisiún Eorpach go gcuirtear leibhéal imleor cosanta ar fáil do shonraí pearsanta iontu, nó;
• I gcás ina mbíonn soláthraithe seirbhíse áirithe in úsáid againn, féadfaimid úsáid a bhaint as conarthaí sonracha atá formheasta ag an gCoimisiún Eorpach ina dtugtar an chosaint chéanna do shonraí pearsanta is a thugtar dóibh san Eoraip.

Déan teagmháil linn má tá faisnéis bhreise uait ar an gcóras sonrach a bhíonn in úsáid againn agus do shonraí pearsanta á n‑aistriú lasmuigh de LEE.

Nuair a gheobhaidh an Leabharlann do chuid faisnéise, úsáidfimid nósanna imeachta diana agus gnéithe slándála diana chun ár ndícheall a dhéanamh nach gcaillfear do shonraí pearsanta trí thimpiste, ná nach n‑úsáidfear iad nó nach ndéanfar iad a rochtain ar bhealach neamhúdaraithe. Bíonn criptiú, srianta rochtana agus gnéithe eile in úsáid ag an Leabharlann chun slándáil do shonraí a áirithiú.

Tá nósanna imeachta curtha i bhfeidhm againn chun déileáil le haon sárú amhrasta ar shonraí pearsanta agus tabharfaimid fógra duit agus d’aon rialtóir infheidhme nuair a bhíonn ceanglas orainn é sin a dhéanamh faoin dlí. 

Trí thoiliú lenár bpróiseáil ar do Shonraí Pearsanta i gcomhréir leis an Ráiteas Príobháideachais seo, i gcás inarb é sin an bunús dlí iomchuí sainaitheanta le haghaidh na próiseála, tugann tú cead dúinn do Shonraí Pearsanta a phróiseáil go sonrach chun na gcríoch a shainaithnítear.

Féadfaidh tú an toiliú a tharraingt siar ag am ar bith ach é sin a chur in iúl go soiléir, le ráiteas nó le gníomh soiléir lena ndeimhnítear a leithéid, gur mian leat an toiliú le próiseáil Sonraí Pearsanta a bhaineann leat a tharraingt siar. Déan teagmháil leis an Oifigeach Cosanta Sonraí leis na sonraí teagmhála thíos má bhíonn aon cheist agat a bhaineann le toiliú a tharraingt siar.

Ní dhéanfaidh tarraingt siar an toilithe difear do dhlíthiúlacht na próiseála bunaithe ar thoiliú roimh a tharraingt siar.

In imthosca áirithe, agus ag brath ar an mbonn dlíthiúil faoina ndéantar próiseáil ar do shonraí pearsanta, tá na cearta seo a leanas agat faoin dlí:

• Faisnéis a iarraidh maidir le cibé acu atá nó nach bhfuil Sonraí Pearsanta maidir leat á gcoinneáil againn agus, má tá, cé hiad na Sonraí Pearsanta sin agus cén fáth a bhfuil siad á gcoinneáil / á n‑úsáid againn.
• Rochtain ar do shonraí pearsanta a iarraidh (ar a dtugtar ‘iarratas duine ar a s(h)onraí’ de ghnáth). Cuirtear ar do chumas leis sin cóip de na Sonraí Pearsanta atá á gcoinneáil againn maidir leat a fháil agus a chinntiú go bhfuil siad á bpróiseáil de réir an dlí againn.
• A iarraidh go ndéanfaí na Sonraí Pearsanta atá againn maidir leat a cheartú. Cuirtear ar do chumas leis sin a iarraidh go ndéanfaí aon fhaisnéis neamhiomlán nó mhíchruinn atá againn maidir leat a cheartú.
• Léirscriosadh do chuid Sonraí Pearsanta a iarraidh. Cuirtear ar do chumas leis sin a iarraidh orainn Sonraí Pearsanta a scriosadh nó a bhaint i gcás nach bhfuil aon chúis mhaith againn le leanúint lena bpróiseáil. Tá sé de cheart agat chomh maith iarraidh orainn do chuid Sonraí Pearsanta a scriosadh nó a bhaint i gcás inar fheidhmigh tú do cheart le cur i gcoinne a bpróiseála (féach thíos).
• Cur i gcoinne na próiseála ar do Shonraí Pearsanta i gcás ina bhfuilimid ag brath ar leas dlisteanach (nó leasanna dlisteanacha tríú páirtí) agus go bhfuil rud éigin i gceist le do chás sonrach féin a fhágann gur mhaith leat cur i gcoinne na próiseála ar an mbonn sin. Tá sé de cheart agat cur i gcoinne na próiseála freisin i gcás ina bhfuil próiseáil á déanamh againn ar do Shonraí Pearsanta chun críoch margaíochta dírí.
• Cur i gcoinne cinnteoireacht uathoibrithe lena n‑áirítear próifíliú, is é sin gan a bheith mar ábhar aon chinnteoireachta uathoibrithe a dhéanfaimid le do Shonraí Pearsanta nó próifíliú ort.
• Srian ar phróiseáil do Shonraí Pearsanta a iarraidh. Cuireann sé sin ar do chumas a iarraidh orainn próiseáil Sonraí Pearsanta maidir leat a chur ar fionraí, mar shampla más maith leat go ndéanfaimid cruinneas na sonraí nó an chúis lena bpróiseáil a fhíorú.
• A iarraidh go n‑aistreofar do Shonraí Pearsanta i bhfoirm leictreonach struchtúrtha chugat féin nó chuig páirtí eile (ar a dtugtar ceart chun ‘iniomparthachta sonraí’ go hiondúil). Cuireann sé sin ar do chumas do shonraí a thógáil uainn i bhformáid atá inúsáidte go leictreonach agus a bheith in ann do shonraí a aistriú chuig páirtí eile i bhformáid atá inúsáidte go leictreonach.

Cheapamar Oifigeach Cosanta Sonraí chun monatóireacht a dhéanamh ar chomhlíonadh na gceanglas maidir le cosaint sonraí agus ar chomhlíonadh an Fhógra seo agus ár mbeartas gaolmhar. Déan teagmháil leis an Oifigeach Cosanta Sonraí má tá ceist ar bith agat faoin bhFógra seo nó maidir le comhlíonadh i ndáil le cosaint sonraí.

Más mian leat do chearta a fheidhmiú, déan teagmháil leis an Oifigeach Cosanta Sonraí a thabharfaidh freagra ar an iarratas laistigh d’aon mhí féilire amháin.

Is féidir teagmháil a dhéanamh lenár nOifigeach Cosanta Sonraí mar seo a leanas:
Ríomhphost: dataprotection@nli.ie
Seoladh poist: 4 Sráid Chill Dara, Baile Átha Cliath 2, D02 A322

Tá sé de cheart agat, mar an duine is ábhar do na sonraí, gearán a dhéanamh am ar bith le húdarás maoirseachta i ndáil le ceist ar bith a bhaineann leis an bpróiseáil a dhéanaimid ar do Shonraí Pearsanta. Ba mhaith linn scéala a fháil uait ar an gcéad dul síos má bhíonn gearán agat faoin úsáid a bhainimid as do shonraí le gur féidir linn an fhadhb a réiteach. Ós rud é gur in Éirinn atá an eagraíocht lonnaithe agus gur ann a dhéanaimid ár bpróiseáil ar shonraí, tagaimid faoi raon feidhme Choimisinéir Cosanta Sonraí na hÉireann ó thaobh cosaint sonraí de.

Is féidir leat teagmháil a dhéanamh leis an gCoimisinéir Cosanta Sonraí mar a leanas:
Suíomh gréasáin: www.dataprotection.ie
Fón: +353 57 8684800 nó +353 (0)761 104 800
Ríomhphost: info@dataprotection.ie
Seoladh: Oifig an Choimisinéara Cosanta Sonraí – Teach na Canála, Bóthar an Stáisiúin, Cúil an tSúdaire, Co Laoise, R32 AP23. Nó 21 Cearnóg Mhic Liam, Baile Átha Cliath 2. D02 RD28 Éire

Déantar athbhreithniú tráthrialta ar an Ráiteas Príobháideachais seo agus, ar an ábhar sin, tá sé faoi réir a athraithe. Ní bheidh feidhm ag athruithe ach amháin maidir le gníomhaíochtaí agus faisnéis ina ndiaidh, seachas ar bhonn iarghabhálach. 

Molaimid duit an Ráiteas Príobháideachais seo a léamh ó am go chéile le déanamh cinnte go dtuigeann tú cén chaoi a n‑úsáidfear aon fhaisnéis phearsanta a sholáthróidh tú.

Molaimid duit an Ráiteas Príobháideachais seo a léamh ó am go chéile le déanamh cinnte go dtuigeann tú cén chaoi a n‑úsáidfear aon fhaisnéis phearsanta a sholáthróidh tú. 

Déanfar aon athrú ar an Ráiteas Príobháideachais seo a fhoilsiú ar an suíomh gréasáin seo le go mbeidh tú ar an eolas i gcónaí maidir leis an bhfaisnéis a bhailíonn tú, maidir leis an úsáid a bhainimid as an bhfaisnéis sin agus maidir leis na himthosca, más ann dóibh, ina ndéanaimid í a nochtadh. 

Féach an Beartas maidir le Fianáin.