Bailiúchán grianghrafadóireachta Covid-19 de chuid Phreas‑Ghrianghrafadóirí na hÉireann faighte ag NLI

Reáchtáladh an ócáid ​​bhronnta sa Leabharlann Náisiúnta (an 15.04.24), agus d’fhreastail baill de Phreas‑Ghrianghrafadóirí na hÉireann agus an tOllamh Luke O’Neill air.

Áirítear sa chartlann 200+ íomhá dhigiteach a deonaíodh, ar ghlac níos mó ná 70 grianghrafadóir preasa ar fud na tíre iad idir 2020-2021.

Taifead ar an saol in Éirinn in aimsir na paindéime atá inti, agus i measc an ábhair tá grianghraif de chleachtadh an scartha shóisialta; caitheamh forleathan masc; ionaid vacsaínithe; foirne spóirt ag imirt i staideanna folmha (agus daoine ag breathnú ar chluichí go tnúthánach trí gheataí atá faoi ghlas); sráideanna tréigthe; oibrithe cúraim sláinte in TCP iomlán, chomh maith leis an gcaoi a ndearna daoine cumarsáid le daoine scothaosta agus leochaileacha, agus pobail ag teacht le chéile – iad ag cleachtadh an scartha shóisialta – le meas a léiriú d’oibrithe túslíne na hÉireann.

Tá grianghraif ann freisin de phríomhoifigigh, leithéidí an Taoiseach Simon Harris, arbh é an tAire Sláinte ag an am sin é; an t-iarPhríomhoifigeach Leighis, an Dr. Tony Houlihan, agus an t-imdhíoneolaí, an tOll. Luke O’Neill. Thug an tOllamh Luke O’Neill óráid aréir ag tabhairt faoi deara go bhféadfadh an fáiltiú ag an Leabharlann Náisiúnta "a bheith ar an gcéad imeacht leathphoiblí chun comóradh a dhéanamh ar Covid-19 agus am a ghlacadh le machnamh a dhéanamh air [in Éirinn]."

Dúirt an Dr. Audrey Whitty: “Is ionann Leabharlann Náisiúnta na hÉireann agus cuimhne na hÉireann ar bhealach. Sa 21ú céad agus an saol mór ag dul le taifid i bhformáidí digiteacha seachas i gcló, is den ríthábhacht é go gcoinnímis cos leis an teicneolaíocht ionas gur féidir linn bailiúcháin a bhí digiteach ón gcéad lá riamh agus atá suntasach ó thaobh cultúir de a bhailiú, a bhainistiú agus a chur ar fáil do na glúnta atá le teacht

Cuirfear an bailiúchán ‘An Saol in Éirinn faoi scáth Covid-19’ ar fáil don phobal amach sa bhliain a luaithe a bheidh catalógú déanta air. Tá an Chartlann Náisiúnta Ghrianghrafadóireachta sa Leabharlann Náisiúnta i mBarra an Teampaill.

Is féidir an phreaseisiúint iomlán a léamh anseo.