Bliain amháin de shuíomh gréasáin nua NLI a cheiliúradh

Ag searmanas Gradaim Spider Dé hAoine, an 1 Márta 2024, bronnadh Gradam Grand Prix ar Annertech agus bigO, in éineacht leis an bhfoireann Cumarsáide agus Forbartha ag NLI, as a gcuid oibre den scoth ar ár suíomh gréasáin nua, atá ar an bhfód bliain amháin inniu. Bronnadh an gradam Sármhaitheas i nDearadh Uilíoch ar an tionscadal freisin, rud is aitheantas ar an dúthracht a caitheadh chun a chinntiú go bhfuil ár suíomh gréasáin éasca le húsáid agus inrochtana do chách.

Le níos mó ná milliún amharc leathanaigh in aghaidh na bliana, is é ár suíomh gréasáin an príomhbhealach ar féidir leis an bpobal rochtain a fháil ar fhaisnéis faoin Leabharlann. Le dhá bhliain anuas, rinneadh roinnt mionleasuithe ar an suíomh gréasáin chun na caighdeáin is airde a bhaint amach agus chun cloí leis na Treoirlínte maidir le hInrochtaineacht Ábhair ar Shuíomhanna Gréasáin (WCAG) 2.1, atá sainordaithe don earnáil phoiblí.

I measc na ngnéithe suntasacha den suíomh gréasáin nua tá feidhm chuardaigh chomhtháite a chlúdaíonn an chatalóg agus an láithreán gréasáin ar fad, féilire imeachtaí atá éasca le húsáid le scagairí cuardaigh, agus rannóg Nuacht agus Scéalta a thugann blaganna cartlannaithe le chéile. Tá an suíomh gréasáin dátheangach.

I gcaitheamh na mblianta, rinneadh roinnt athruithe ó bhonn ar shuíomh gréasáin Leabharlann Náisiúnta na hÉireann, agus chuir gach ceann acu tairiscintí éagsúla na Leabharlainne i láthair ar roinnt bealaí.

San athbhrandáil is déanaí, a chruthaigh Creative Inc beagnach 15 bliana ó shin, tugadh isteach an scéim dathanna shainiúil téal agus uaine. Fuarthas inspioráid don lógó ó na cruthanna agus na dathanna atá i láthair in ailtireacht an Phríomhsheomra Léitheoireachta.

Féach thíos chun spléachadh a fháil ar an gcaoi ar fhorbair agus ar athraigh suíomh gréasáin Leabharlann Náisiúnta na hÉireann in imeacht na mblianta.