Tugann NLI portráid ar iasacht do thaispeántas Ranjit Singh de chuid The Wallace Collection

Scrúdaítear sa taispeántas ardú agus réimeas Maharaja Ranjit Singh. Tháinig Singh chun cinn mar ‘Maharaja’ nó Rí Mór na bPuinseábach gan cheistiú ag tús an 19ú haois. Mar gheall ar a ardú éachtach i gcumhacht, cruthaíodh Impireacht Suíceach nár mhair ach achar gearr, ach a raibh an-tionchar aige agus a mbeadh dlúth-thionchar aige ar rath Impireacht na Breataine i bhfo-ilchríoch na hIndia.

Déantar pearsantacht charasmatach Singh agus a réimeas mór le rá a fhiosrú trí shaothair ealaíne Suíceach, lena n-áirítear airm agus armúr, teicstílí, seodra, pictiúir uiscedhatha, chomh maith le saothair le healaíontóirí ón Iarthar a d’oibrigh i gcúirt Singh.

Áirítear in  Ranjit Singh: Sikh, Trodaí, Rí iasachtaí ó mhór-iasachtóirí ón RA agus idirnáisiúnta, lena n-áirítear Músaem Victoria agus Albert, Iontaobhas an Bhailiúcháin Ríoga, Leabharlann na Breataine, an Musée du Louvre, agus Leabharlann Náisiúnta na hÉireann, i measc cinn eile.

Thug Leabharlann Náisiúnta na hÉireann ar iasacht portráid de Raja Lal Singh, an príomh-aire carasmatach, a sholáthraíonn príomhíomhá de ghaiscíoch Suíceach ag caitheamh armúr na hEorpa. Téama riachtanach den taispeántas is ea nádúr ilghnéitheach chúirt Ranjit Singh, arb é snáithe d’armas, armúr, teaicticí na hEorpa chomh maith le comhairleoirí agus ealaíontóirí é.

Soláthraíonn an pictiúr uiscedhatha álainn seo íomhá amhairc riachtanach don taispeántas ina bhfuil líon mór de réada tríthoiseacha, armúr san áireamh. Ina theannta sin, feidhmíonn scéal Raja Lal Singh féin mar chuid thábhachtach d'insint an taispeántais beathaisnéise seo ar Ranjit Singh.

Tá an mhír seo mar chuid de pháipéir mhuintir Gough a bhronn Catherine Kennedy née Gregory, iníon le Margaret Gregory née Parry agus Robert William Gregory ar NLI in 1983. Tar éis bhás Robert Gregory, phós a máthair Guy Vincent Hugh Gough, sin-garmhac le Field Marshal Hugh Gough, an 1ú Bíocunta Gough de Goojeret. Tháinig páipéir mhuintir Gough i seilbh Catherine Kennedy nuair a fuair a leasathair bás in 1959. Ní raibh aon leanaí bitheolaíocha aige.

Bhí Raja Lal Singh i gceannas ar fhórsaí na Suíceach in aghaidh arm na Breataine le linn an Chéad Chogadh Angla-Suíceach (1845-46) agus buaileadh é ag Cath Sobraon ar an 10 Feabhra 1846. Bhí an Ridire Hugh Gough, Ardcheannasaí Arm Bheangál i gceannas ar arm na Breataine. Ní fios cén chaoi a bhfuair sé an phortráid.

Tá an phéintéireacht seo mar chuid de shraith portráidí sa taispeántas ina bhfuil roinnt ball iomráiteach den chúirt Suíceach a tháinig slán ó thitim na coimhlinte. Insíonn sé go foirfe na comhchealga agus an phátrúnacht ealaíne a tharla le linn riail na Suíceach le linn tréimhse corraitheach.

Faigh tuilleadh eolais ar shuíomh Gréasáin The Wallace Collection.