Físeán agus Acmhainn In-Íoslódáilte | Stair á Nochtadh: Hanna Sheehy-Skeffington
Gníomhaí agus polaiteoir mór le rá a bhí in Hanna Sheehy-Skeffington in Éirinn agus thar lear roimh, i rith agus i ndiaidh thréimhse réabhlóideach na hÉireann. D’oibrigh sí ar chúiseanna iomadúla, lena n-áirítear vótáil na mban, náisiúnachas na hÉireann, sóisialachas, agus comhionannas inscne, agus bhí sí ina ball de pháirtí Shinn Féin agus ina comhairleoir de chuid Bhardas Bhaile Átha Cliath a raibh tionchar aici.
Maidir le Stair á Nochtadh
Cuirtear i dtábhacht i Stair á Nochtadh scéalta ceathrar, Austin Clark, Hanna Sheehy-Skeffington, Kathleen Clarke, agus Art Ó Gríofa, a bhí lárnach in imeachtaí 1922 agus 1923 in Éirinn. Cuirtear i dtábhacht sna ceithre fhíseán agus san aiste bheathaisnéise grianghraif digitithe, litreacha, iontrálacha dialainne, agus go leor eile ó bhailiúcháin shaibhre na Leabharlainne.
Scrúdaítear san ábhar bunú eagraíochtaí tábhachtacha cosúil le Sinn Féin le hArt Ó Gríofa, iriseoir agus polaiteoir a bhí ar dhuine de na príomh-idirbheartaithe sa sos cogaidh a chuir deireadh le Cogadh na Saoirse. Nochtar i saol agus gníomhartha chomhbhunaitheoir Chumann na mBan, Kathleen Clarke, na róil a bhí aici ó choimeádaí cuimhní Éirí Amach na Cásca 1916, go dtí a gairm pholaitiúil ardtionchair agus a ceapadh mar an chéad Ard-Mhéara mná ar Bhaile Átha Cliath. Léiríonn na hábhair freisin an tionchar a bhí ag gluaiseacht vótála na mban ar shochaí na hÉireann agus ar an ngluaiseacht náisiúnach trí fhocail agus gníomhartha Hanna Sheehy-Skeffington, polaiteoir náisiúnach agus sufraigéid mhíleatach. Ar deireadh, léirítear i scéal Austin Stack an tábhacht a bhaineann le hAthbheochan Chultúrtha na hÉireann agus grúpaí mar an Cumann Lúthchleas Gael don fhéiniúlacht Éireannach agus don náisiúnachas cultúrtha. Buaiteoir boinn uile-Éireann ab ea Stack, a raibh baint mhór aige le gníomhaíochtaí míleatacha náisiúnacha.
Léiríonn saolta na bpríomhdhaoine seo, a gcaidrimh, a gcreidimh pholaitiúla agus a ngníomhartha, an t-athrú ollmhór a tharla ar fud na hÉireann agus an domhain i dtús an fhichiú haois. Léiríonn a scéalta go háirithe an tionchar a bhí ag an gCogadh Cathartha ar shochaí na hÉireann agus na hiarmhairtí fadtéarmacha a bhí mar thoradh ar an deighilt seo ar feadh na mblianta ina dhiaidh sin.
Ní léiríonn an t-ábhar seo ach cuid de na mílte ábhar digitithe de chuid na Leabharlainne a insíonn scéal na tréimhse 1913-1923, rud nárbh fhéidir a chur ar fáil gan an maoiniú a fuarthas ón Roinn Turasóireachta, Cultúir, Ealaíon, Gaeltachta, Spóirt agus Meán. Is féidir rochtain a fháil air ó áit ar bith ar fud an domhain trí chatalóg ar líne na Leabharlainne.
Más féidir lenár bhfoireann aon chúnamh a thabhairt duit, déan teagmháil linn ag learning@nli.ie
