Leabharlann Náisiúnta na hÉireann le litríocht chomhaimseartha na hÉireann a cheiliúradh agus Éireannaigh a bhfuil Duais Booker bainte acu a thabhairt le chéile le haghaidh sraith uathúi

Cuirfear tús leis an tsraith ‘Ceiliúradh á Dhéanamh ar Éireannaigh a bhfuil Duais Booker bainte acu’ ar an 23 Aibreán nuair a bheidh buaiteoir reatha Dhuais Booker, Paul Lynch, i mbun comhrá leis an úrscéalaí Belinda McKeon. Léifidh an tUasal Lynch sliocht ón úrscéal sárdhíola idirnáisiúnta a chuir sé amach in 2023, ‘Prophet Song’, le tús a chur leis an imeacht; ina dhiaidh sin déanfar mionphlé ar an leabhar, chomh maith lena ghairm bheatha go ginearálta, agus tabharfar cead cainte ansin don lucht féachana sula dtabharfar an t-imeacht chun críche. Leanfar ar aghaidh leis an tsraith i mí na Bealtaine agus mí an Mheithimh le buaiteoirí eile amhail John Banville, Anne Enright, agus Roddy Doyle.

Seo a leanas an tsraith iomlán ‘Ceiliúradh á Dhéanamh ar Éireannaigh a bhfuil Duais Booker bainte acu’:

Dé Máirt, an 23 Aibreán           

Buaiteoir Dhuais Booker 2023, Paul Lynch, i mbun comhrá le Belinda McKeon maidir le ‘Prophet Song’.

Dé Máirt, an 7 Bealtaine                      

Buaiteoir Dhuais Booker 2005, John Banville, i mbun comhrá le Claire Kilroy maidir le ‘The Sea’.

Dé Máirt, an 14 Bealtaine        

Buaiteoir Dhuais Booker 2007, Anne Enright, i mbun comhrá le Nuala O’Connor maidir le ‘The Gathering’.

Dé Máirt, an 11 Meitheamh     

Buaiteoir Dhuais Booker 1993, Roddy Doyle, i mbun comhrá le Rob Doyle maidir le ‘Paddy Clarke Ha Ha Ha’.

Is é an cláreagraí liteartha Alan Hayes coimeádaí na sraithe.

Beidh na himeachtaí ar siúl i Leabharlann Náisiúnta na hÉireann, Sráid Chill Dara, Baile Átha Cliath 2, agus gach ceann acu le tosú ag 6:30pm

Dúirt an Dr. Audrey Whitty, Stiúrthóir Leabharlann Náisiúnta na hÉireann: “Is í Leabharlann Náisiúnta na hÉireann leabharlann taifid na hÉireann agus tá sí ar cheann de leabharlanna taisce dlíthiúla na tíre chomh maith. Fágann sé sin go bhfuil cóip de gach leabhar a fhoilsítear in Éirinn, gach leabhar le húdar Éireannach; 

agus gach leabhar a bhfuil spéis Éireannach ann ag NLI. Áirítear leis sin gach uile leabhar leis na hÉireannaigh a bhfuil Duais Booker bainte acu.

“Tá cultúr agus stair liteartha an-saibhir ag Éirinn, agus is mór an onóir dúinn na daoine mór le rá seo i saol na liteartha comhaimseartha a thabhairt le chéile mar chuid den tsraith seo ‘Ceiliúradh á Dhéanamh ar Éireannaigh a bhfuil Duais Booker bainte acu’. Táim ag tnúth go mór leis na comhráite a chloisteáil agus na buaiteoirí Booker seo ag déanamh plé ar a gcuid úrscéalta le scríbhneoirí eile.

“Le scéal na hÉireann a insint, ní mór dúinn ceiliúradh a dhéanamh ar scríbhneoireacht chomhaimseartha na hÉireann, agus tá an-áthas orainn ár gcion féin a dhéanamh chuige sin. Tá na himeachtaí saor in aisce agus oscailte do chách, ach níl ach líon teoranta ticéad ar fáil. Mar sin, molaimid áirithint a dhéanamh gan mhoill.”

Bhí an méid seo le rá ag Ceannasaí Taispeántas, Foghlama agus Cláreagraithe Leabharlann Náisiúnta na hÉireann, an Dr. Sinéad McCoole: “Tá lúcháir orainn go bhfuil an tsraith thionscnaimh seo le díriú ar litríocht chomhaimseartha na hÉireann agus le ceiliúradh a dhéanamh orthu siúd a bhfuil aird idirnáisiúnta gnóthaithe acu as Duais Booker a bhaint. Tá sé thar a bheith tábhachtach cluas a thabhairt do scríbhneoirí i mbun comhrá le scríbhneoirí in áit a bhfuair an oiread sin d’fhathaigh liteartha an ama atá thart a n-inspioráid i leabhair agus i bpáipéir na ndaoine a tháinig rompu.”

Dúirt coimeádaí na sraithe, Alan Hayes: “Tá Éire aitheanta go hidirnáisiúnta as feabhas ár gcuid litríochta, agus ní haon ionadh é mar sin go bhfuil ag éirí chomh hiontach sin leis an tír in ainneoin a laghad atá sí. Is í Leabharlann Náisiúnta na hÉireann stór beo scríbhneoireacht na hÉireann sa dá theanga; is í bunchloch ár gcultúir í agus tá sí i gcroílár ár sochaí. Is mór an pléisiúr dom mar sin a bheith ag obair leis an Dr. Audrey Whitty agus leis an bhfoireann fhuinniúil atá curtha le chéile aici le ceiliúradh a dhéanamh ar na leabhair agus ar na húdair cheannródaíocha seo a bhfuil clú agus cáil bainte amach acu, ní hamháin anseo in Éirinn, ach ar fud an domhain chomh maith.”

Is féidir ticéid don tsraith ‘Ceiliúradh á Dhéanamh ar Éireannaigh a bhfuil Duais Booker bainte acu’ a chur in áirithe ar láithreán gréasáin NLI. Tá na ticéid saor in aisce, ach níl ach líon teoranta áiteanna ar fáil. Mar sin, moltar áirithint a dhéanamh gan mhoill.

CRÍOCH